LLITERATURA DE TRESMISIÓN  ORAL
 

La lliteratura de tresmisión oral ye aquella que tresmite un pueblu de xeneración en xeneración.

N’Asturies caltiénse mui bien esti tipu de lliteratura quiciabes pola so estructura xeográfica, pol aislamientu y falta de bones comunicaciones a lo llargo de munchu tiempu y pola  l’organización familiar d’antaño. En casa siempre había un güelu  o una güela que cuntaba histories a los neños.

La tresmisión d’esti tipu de lliteratura va xunida a delles xeres que se facien n’andecha como les esfoyaces, filandones y  fiestes o romeríes. Tamién yera importante la tresmisión lliteraria que facíen los ciegos de pueblu en pueblu o los xastres.

Xéneros de la lliteratura de tresmisión oral

Narrativa	Llírica	Otres manifestaciones de la cultura popular
Cuentos populares Lleendes Fábules Asocedíos	Cantares Coples Romances	D’espardimientu	Máxico- relixoses	Declaratives
		Cosadielles Fórmules Retafiles Traballingües	Conxuros Oraciones Mitos Formules curatives	Dichos Refranes

Dichos y cosadielles

¿Qué cosa cosadiella ye, que da en focicu y nun lu ves?

(l’aire)

Xente d‘Uviéu tambor y gaita; y los d’alredor, gaita y tambor.

Pa bendicir la tierra

Sali sapu, sali ratu,

sali tola comezón:

qu’equí va l’agua bendito

y el ramu de la Pasión.

Cantares

Aserrín, aserrán,

maderinos de San Xuan;

los del rei sierren bien,

los de la reina tamién,

sierra’l duque:

truque, truque, truque.

Conxuru contra’l mal del filu

Filu te corto

filu de saco

pola gracia de Dios

ya del Espíritu Santu.

El cuentu del osu, el llobu y el raposu

Ello yera l’osu, el llobu y el raposu que diben una vez caminando pel monte y deprendieron una colmena. Y dixo’l raposu:

-Vamos partila por edaes.

Y dixo l’osu:

-Yo tengo doscientos años.

Diz entós el raposu:

-¡Ai, Dios! Doscientos años yá tenía yo cuando´l carbayu nació.

Y diz el llobu:

-Yo tengo once

 y voi pa la ucena,

 pero de los dos

nengún me cueme la colmena.

Bibliografía

GARCÍA, Antón. Lliteratura Asturiana nel tiempu . Ed. Serviciu Publicaciones. Principáu d’Asturies. 1994.

MORI, Marta; FERNÁNDEZ, Pilar; PRIETO, María. Fala que fala. Ed. Trabe. 2006

FERNÁNDEZ,  Xurde;  GARCÍA, María Ángeles. A la gueta del material espardío. Ed. Cpr de Oriente. 2008.