YE TIEMPU DE CASTAÑES    

N’Asturies hai munches variedaes de castañes, darréu vamos nomar dalgunes:

·        Valduna: ye de les mas conocíes nel territoriu asturianu, destaquen pol so sabor, pol so tamañu, color y brillu.

·        Vaqueira: ta presente nel occidente d’Asturies, ye fácil de pelar y tien bon sabor, ye de color escuro, brillu normal y tamañu medianu.

·        Miguelina: Llámase asina porque madura per San Miguel tienen gran valor comercial y son pequeñes.

·        Parede: Tamién tán estendíes per Galicia, n’Asturies llocalícense  na fastera suroccidental destaquen pol so frutu y pola calidá de la madera dela castañal.

·        Grúa: una variedá  oriental de castañes, lo que mas llama l’atención ye'l so tamañu y sabor.

·        Chamberga: una de les más populares xunto cola valduna, tamién ye dulce, de color claro, con brillu y marrón natural.

·        Bacoa: solo s’alcuentra na zona d’Ibias, ye la única de toes que valdría pa facer “marrón glacé”pol so tamañu y la facilidá pa pelala.

Les castañes son el frutu de la castañal. N’Asturies hai tovía castañeos comunales onde podemos dir a la gueta (pañar castañes del suelu). La madera de la castañal úsese na construcción de cases, horros y muebles.

Hai dos clases de castañales:

Inxertaes: les que dan castañes.

Monteses: úsense pa madera.

La seronda ye’l tiempu les castañes, les primeres que caen son les madures, pero la mayoría había que les facer cayer ximielgando l'árbol.

Subíense, tamién, los homes a les castañales con ayuda d’unos cambos (ganchos) y andaben peles cañes valiéndose d’unes piértigues de 3 a 6 metros pa dimir.

Cuando yá taben nel suelu garrábense con una especie de tenaces de madera (fuste, fornaces o morgaces) y echábense nun cestu o paxu.

El consumu de les castañes podía ser en crudo, cocies o amagostaes.

Axuntase p'amagostar ye un vezu tradicional y facíase con un tambor de metal afuracáu  con una exa pa facelu dar vueltes. L’amagüestu facíase nuna güerta o nun prau cercanu a una casa y mientres amagostaben los mozos cantaben,  bailaben  y bebíen sidra dulce.

N’Asturies caltiénense cosadielles, dichos,fases feches y traballingües que pertenecen al nuesu patrimoniu lliterariu  de tresmisión oral.

Frases feches.

A toa castaña – dir rápido.

Sacar les castañes del fueu – solucionar a daquién un problema.

Sacudir bien les castañes – facer daqué con munchu interés y rapidez.

Nun asar castañes con ún – nun querer rellaciones.

Dichos.

Agostu secu,  castañes en cestu.

Sardines con boroña y castañes na forna.

Castaña cañuela, que’l gochu nun te cueya.

Cosadielles.

¿Qué cosa cosadiella ye...?

Somos color chocolate,

ablandamos al calor

si nos meten nel fornu

esplotamos con furor.

Por fuera marrón, per dientro blanca

     si me ponen al fueu españa.

Tando pinguín, pingando,

vieno focín, fozando

y comió a pinguín, pingando.

Marcho focín fozando

y quedó pinguín pingando.

Y pa finar coles cosadielles, una n’asturianu occidental.

Nací na barriga mia mai,

ya paríume mía buela,

cola ll.ana pa dientru

ya la piel pa fuera.  

¿Qué cosadiella ye…?

Pa finar queremos dexavos una receta de pote de castañes, a ver si vos animáis a facela.

Pote de castañes.

Ingredientes:

1 kg y ½ de castañes mayuques.

Un plizcu de sal.

Zucre, una cuyarada.

Un puñáu de fabes.

1 cebolla.

2 o 3 chorizos.

Agua (pa cocelo too).

Poner les castañes y el puñáu de fabes a remoyar la nueche anterior.

Coceles col plizcu de sal y el zucre.Cuando tean un poco cocíes garrar unes castañes y pisales pa engordar el caldu. Un poco dempués echar los chorizos (fervíos aparte) y dexalos cocer otro poco.