La Lliteratura na Edá Media.

A finales del sieglu XII y principios del XIII l’usu del romance asturianu como llingua d’escritura yera habitual. D’esta dómina atopamos lliteratura xurídica y lliteratura non xurídica.

 Dientro de la lliteratura xurídica atopamos  fueros, ordenances municipales o documentos notariales.

Les ordenances municipales son los reglamentos que rixen nun conceyu, les mas importantes son les Ordenances del Conceyu d’Uviéu.

Los documentos notariales que más atopamos  son  testamentos, escritos sobre donaciones y otros documentos privaos.

Los fueros, recoyendo pallabres de García Arias son “testimoniu cimeru del ordenamientu xurídicu del reinu ástur”. Consérvase'l Fueru Xulgu,  el Fueru d’Avilés y el Fueru d’Uviéu.

Darréu vamos ver un videu del historiador Pablo Rodríguez Alonso nel que’l  profesor Xulio Viejo, de la Universidá d’Uviéu,  esplica lo que son los fueros y tola la documentación medieval qu’atopamos n’Asturies.

Lliteratura nun xurídica. Documéntase nel añu 1199  la esistencia d’un xuglar ye la primer referencia qu’apaez sobre un trovador asturianu pero, lo lóxico ye pensar qu’hubo xuglares y que foron los que tresmitieron obres de diferentes xéneros poéticos.  Poro atopamos l’usu d’asturianu en obres como’l  Llibru d’ Alexandre, que narra la vida Alexandru’l Magnu,  o La disputa d'Elena y María que ye una obra na que dos muyeres discuten si ye meyor un guerreru o un clérigu de mozu.

Nesti fragmentu de La disputa d'Elena y María, Elena,  empondera al guerreru y critica al clérigu

… a mi tien honrada

Vestida y calzada

Vísteme de cendal

Y d'otro que más val.

Créasme de cierto

que val más un besu d’infanzón

que cinco d’abadón

como’l tol barbirrapáu

que siempre anda en so capa encerráu

que la cabeza y la barba y el pescuezu

non semeya senón escuesu…

Y María contesta criticando al guerreru

…cuando non tien qué xogar

nin otro a que tornar

va la siella empeñar

a los francos de la cai;

Y el frenu y l’albardón

dalo a su rapazón

que lo vaya a vender

y empeñar pa comer;

seique hai ratos

qu’allá van las espuelas,

a pie bien muchas vegadas,

desnudu y sin calzas…

Bibliografía.

Rede 2. Llingua Asturiana. Ed. Vtp

FERNÁNDEZ,  Xurde;  GARCÍA, María Ángeles. A la gueta del material espardío. Ed. Cpr de Oriente. 2008.

Videu – Ar@z Producciones.